Azərbaycan Respublikasının Baş Prokurorluğunda “Şahid Dindirmə Müsabiqəsi”nin 5-ci buraxılışının final mərhələsi keçirilib.
2025-ci ilin “Konstitusiya və Suverenlik ili” çərçivəsində, Avropa Hüquqşünas Tələbələr Assosiasiyasının (ELSA) Bakı İctimai Birliyi ilə əməkdaşlıq çərçivəsində Baş Prokurorluqda “Şahid Dindirmə Müsabiqəsi” təşkil edilib.
Müsabiqə bir neçə mərhələdən ibarət olmaqla 13 oktyabr tarixində təlim mərhələsi, 22 oktyabr tarixində yarımfinal, 29 oktyabr tarixində isə final mərhələsi üzrə həyata keçirilib.
Bu təşəbbüs Konstitusiya və suverenlik dəyərlərinin hüquqşünas gənclər arasında daha dərindən mənimsənilməsi, eləcə də praktiki-peşəkar bacarıqların inkişafı məqsədini daşıyır.
Final mərhələsində iştirakçılar real istintaq situasiyalarını canlandıraraq şahid ifadələrinin əldə edilməsi, sual vermə taktikasının qurulması, prosessual davranış və hüquqi əsaslandırma sahəsində bilik və bacarıqlarını nümayiş etdirib. Müsabiqənin qiymətləndirilməsi hakimlər qismində çıxış edən Baş Prokurorluğun əməkdaşları tərəfindən aparılıb.
Final mərhələsinin nəticəsinə əsasən Bakı Dövlət Universitetinin hüquq fakültəsinin III kurs tələbələri Aydan Cəfərli və Mehri Ağazadə I yerə, Bakı Dövlət Universitetinin hüquq fakültəsinin III kurs tələbələri Zərəngiz Həsənova və Aysu Hüseynova II yerə, Bakı Dövlət Universitetinin hüquq fakültəsinin IV kurs tələbələri Nəzrin Abdullazadə, Fatimə Fərruxlu və Bakı Dövlət Universitetinin hüquq fakültəsinin IV kurs tələbələri Nuray Əhmədova və Fidan Məmmədli III yerə layiq görülmüşdür. Göstərdiyi təşkilati və təlimçi dəstəyinə görə Baş Prokurorluğa dərin minnətdarlığımızı bildiririk.
Müsabiqənin sonunda final mərhələsində iştirak edən hər üç komandaya sertifikat, pul mükafatı və xüsusi hədiyyələr verilmiş, prokurorluq əməkdaşlarına və partnyorlarımızın nümayəndələrinə təşəkkürnamələr təqdim edilmişdir.